KREANek, Eusko Jaurlaritzako Natura Ondare eta Klima Aldaketara Egokitzeko Zuzendaritzak sustatutako lizitazioan esleipendun izan ondoren, Bidasoaren bokaleko oinezkoentzako pasabide berriaren eta pasealeku eta bidegorriaren obren zuzendaritza eraman du, nazioarteko lau zubien parean, Irunen (Gipuzkoa).

Proiektua Eusko Jaurlaritzaren "Txingudiko badiaren inguruko naturguneak lehengoratzeko eta haien konektibitatea hobetzeko plan zuzentzailearen" barruan dago, eta 3,4 milioi euroko aurrekontua izan du.

Pierre Loti pasealekua izeneko ibilbidea Plaiaunditik abiatzen da eta Hondarribia, Irun eta Hendaia lotzen ditu. 1,2 kilometroko luzera du eta 350 metro pasabide inguru ditu ibilbidean zehar. Egurrezko pasabide horrek 3,5 metroko zabalera du, eta pilote metalikoen bidez zimendatuta dago, ibai-ohean sartuta. Marea-lasterketek eta zubipeko galibo-mugek baldintzatu dituzte lanak. Lehorretik egurrezko pasabiderako trantsizioa bi muturretan egin da, mutur bakoitzean 12 eta 10 metro argiko zurezko zubiak erabiliz. Azken 60 metroak egungo ertza egokituz lortu dira, eta pasealeku asfaltatu bat lortu da lursailaren gainean, 3,5 metroko zabalerarekin. Oinezkoen eta bizikleten joan-etorria ia ibilbide osoan banatuta dago, egurrezko pasabidean izan ezik, plataforma partekatua baita. Bertan behera utzitako orube bat ere berreskuratu da, 30 plazako aparkalekua egiteko.

Txingudiko badiaren inguruan dago ibilbide hori, eta Europako Natura 2000 Sarearen barruan KBE (Kontserbazio Bereziko Eremua) eta HBBE (Hegaztientzako Babes Bereziko Eremua) izendatu dira. Nazioartean garrantzia duen hezegunea ere bada, Ramsar Hitzarmenaren arabera. Ibilbide berriko proiektu hau, beraz, balio ekologiko handiko eremu batean garatu da, eta ahalik eta errespetu handiena izan dio ondare naturalari.

KREAN Administrazioarekin elkarlanean ari da Txingudiko badiaren eremua lehengoratzeko hainbat proiektutan.